Newsroom
09-10-2008 (back to newsroom)Awe dia 9 di oktober, Post ront mundu, ta selebrá dia International di Post.
E mensahe ku Minister di Telecomunikashon y Post, Minister Maurice Adriaens kier a komparti ku nos pueblo di Antias ta un relato for di e mensahe di e Director General di Union Postal Universal, kual ta titulá : Servicio Postal Desidido pa Enfrenta Futuro".
Awe, biyones di paki, karta i itemnan èksprès ta ser manda pa hendenan rònt mundu. Produkto òf dokumentonan importante, transferensia finansiero di migrantenan ku deseonan pa nan famia, korant i bukinan… i asina e lista ta sigui.
No opstante predikshonnan di no muchu tempu pasa, ku servisionan di post lo stòp di eksisti, nos tin di remarka ku servisionan postal ta bibitu i den bon kondishon i awor mas nesesario ku nunka. E-mail i internet no a reemplasa nan, pero al kontrario a krea oportunidatnan nobo. Nos ta biba den un tempu kaminda diferente medio di komunikashon ta komplementa otro. Sektor postal ta duna un servisio balioso so solamente pa esnan ku ta kumpra òf bende “on-line”, pero tambe pa esnan ku no por hasi uso kompleto di teknologianan nobo i pa kende servisio di post ta un konekshon ku e mundu pafo di nan ambiente. Ku kresementu di negoshi internashonal i inter-regional, mester sera e bashi den desaroyo entre servisionan postal rònt mundu, pa asina tantu negoshi komo individuonan por benefisia mas di nan.
Adoptando un estrategia postal nobo, paisnan ku a partisipa na e di 24 Kongreso di Union Postal Universal na Ginebra na yuli i ougustus ultimo, a duna nan mes un mapa pa e futuro di e sektor su desaroyo. E estrategia nobo aki ta enkurasha kresementu di merkado, interkonekshon di retnan i un maneho mas estrikto di e sektor.
Metanan spesifiko ta pidi pa servisionan postal ta miho posishona den un ambiente karakterisa pa kompetensia fuerte, globalisashon, liberalisashon di merkado i kresementu rapido di teknologianan nobo. E mapa ku a ser adopta pa UPU ta enkurasha operadornan pa duna un servisio mas rapido, mas konfiabel pa asina kumpli ku nesesidatnan di tantu usuarionan, kliente priva komo negoshinan. Prioridatnan di UPU den e siguiente ananan benidero lo inklui fortalese servisio universal, kalidat di servisio, modernisashon di servisionan di pago, implementashon di un polisa pa adresnan (un adres ta un komponente esensial di kada persona su identidat), medio ambiente i desaroyo sostenibel.
Awe, riba dia mundial di pòst, mi ta hasi un yamado riba tur pais miembro di Union Postal Universal i operadornan di servisionan postal universal pa hasi un kompromiso firme, ku tur esnan ku ta hunga un rol den sektor postal, pa modernisa servisionan postal pa asina nan por sigui kontribui den nan totalidat na desaroyo ekonomiko i social.
E ophetivonan aki ta konforme ophetivonan di polisa i prioridatnan di Nashonnan Uni. Ta bale la pena pa rekorda ku UPU e ana aki orguyosamente ta selebra su di 60 aniversario komo un agensia spesialisa di Nashonnan Uni. For di 1948, sektor di post a hasi kontribushonnan balioso na e mishon noble di Nashonnan Uni – asistiendo den desaroyo, redusiendo pobresa i e separashon digital, promoviendo salud, protekshon ambiental i desaroyo sostenibel djis pa menshona algun.
Debi na nan universalidat, servisio postal ta provee un konekshon entre hende rònt mundu. Esaki ta importante spesialmente den un tempu kaminda miyones di hende no ta gosa di e derechi di komunikashon. Den un mundu ku konstantemente ta kambia, servisionan postal ta hasi posibel pa establese i mantene tantu kontakto komo e konekshon aki; di kual tur dos ta vital.
Minister Adriaens kier probechá di e oportunidad aki pa felisitá tur trahador di Post riba e dia aki.